ມື້ຄືນ ນອນຝັນວ່າ ຮູ້ວ່າໂຕເອງຊິຕາຍ ແຕ່ກຽມຫຍັງບໍ່ທັນ ກໍເລີຍວ່າຊັ້ນກໍຢູ່ລ້າໆ ຊະ ແລ້ວບາດນັ້ນກໍຕາຍ ຕາຍແລ້ວປາກົດວ່າໄປຢູ່ຫ້ອງເອື້ອຍ (ໃນຝັນມີເອື້ອຍສອງຄົນ ແປກດີ) ເອື້ອຍເພິ່ນລະຢ້ານ ຮູ້ວ່າມີຜີໃນຫ້ອງ ແຕ່ບໍ່ຮູ້ວ່ານ້ອງຕາຍເທື່ອ ບໍ່ຢາກຫຼອກກໍເລີຍອອກຈາກຫ້ອງມາ ຍ່າງຜ່ານຝາຫ້ອງອອກມາ ແລ້ວກໍມານັ່ງຫຼິ້ນເນັດ ຂຽນ blog ນັ່ງຄິດວ່າ ຕາຍແລ້ວຍັງມີເນັດໃຊ້ ຊິຂຽນເລົ່າຫຍັງດີຫວະ ເອີ ຊິເລົ່າວ່າ ຕາຍແລ້ວມີເນັດໃຊ້ກ່ອນ -”-

ເບິ່ງໃນ Google ບອກວ່າ ຝັນວ່າຕາຍ ໝາຍຄວາມວ່າ ຈະມີອາຍຸຍືນ ຫຼືໄດ້ໂຊກລາບຈາກຜູ່ໃຫຍ່

ກ່ອນໜ້ານີ້ເອົາລົດໄປແປງ ກໍແປງຫຼາຍຢ່າງ ແລ້ວກໍແປງແອນຳ ເຊິ່ງປາກົດວ່າ ແປງແລ້ວກໍບໍ່ເຫັນແອຊິເຢັນຫຍັງເລີຍ ກໍເຊັງໄປຕາມໆ ກັນ

ກໍບໍ່ໄດ້ຄຶດຫຼາຍກ່ຽວກັບເລື່ອງແອແປງແລ້ວບໍ່ດີ ມີແຕ່ຈົ່ມໆ ເສຍດາຍໄປຕາມເລື່ອງຕາມລາວ ກໍບໍ່ຮູ້ເປັນຫຍັງ ມີຢູ່ຄືນນຶ່ງ ປະມານຄືນກ່ອນ ຝັນວ່າ ນັ່ງລົດໄປໃສຄົນດຽວ ແລ້ວເປີດແອໃນລົດ ຈາກນັ້ນເອົາມືໄປໃກ້ໆ ແອເບິ່ງ ມັນກໍເຢັນນ້ອຍໆ ມາ ຂັບໄປດົນເຕີບ ມັນເຢັນຈົນໜາວເລີຍລະ ກໍດີໃຈວ່າແອມັນດີແລ້ວເນາະ

ຕື່ນມາພົບວ່າຝັນຊື່ໆ ແລ້ວກໍເປີດພັດລົມຖິ້ມໄວ້ ສົມພໍມັນໜາວໄປຮອດໃນຝັນ

ຄືນວັນທີ 17 ກໍລະກົດ 2011 .. ຝັນວ່າໄປທ່ຽວກັບຫຼາຍຄົນ ມີຍາດຕິພີ່ນ້ອງ (ທີ່ບໍ່ຮູ້ຈັກ..​ໜ້າຈະເປັນຂອງຝ່າຍອື່ນພາໄປ) ແລ້ວກໍໝູ່ເພື່ອນທັງຫຼາຍ ໂດຍໃຊ້ລົດຕູ້ທີມງານຄຸນນະພາບໄປ .. ສະຖານທີ່ນັ້ນ ເປັນສວນທີ່ມີດອກໄມ້ງົດງາມສຸດສາຍຕາ ມີແດດສ່ອງລົງມາໃນຍາມແລງເປັນສີສົ້ມສວຍສົດງົດງາມ… ແຕ່ຕອນຂາກັບ ປາກົດວ່າ ລົດເພຫຼາຍບ່ອນ ແລະມີຄົນເຮັດໃຫ້ອຸປະກອນກ້ອງຂອງຜູ່ຝັນເສຍຫາຍ ຈຶ່ງເກີດຄວາມໂມໂຫຂຶ້ນມາເລັກນ້ອຍເຖິງປານກາງ. ໃນຝັນ ມີເດັກນ້ອຍອາຍຸປະມານ 5-6 ປີໄປນຳຄົນນຶ່ງ.

ຄວາມຝັນຂອງມື້ຄືນ ເລີ່ມຕົ້ນຈາກຈຸດໃດກໍບໍ່ຮູ້ ແຕ່ສິ້ນສຸດດ້ວຍການຖືກໄລ່ລ່າ ແລ້ວເຂົ້າໄປໃນຖ້ຳ ຫຼືສະຖານທີ່ ທີ່ຄ້າຍໆ ກັບເຮືອນຮ້າງຫຼັງໃຫຍ່ ເຊິ່ງມີຫ້ອງເກັບເຄື່ອງຢູ່ ເປັນຫ້ອງມືດໆ ທີ່ເຕັມໄປດ້ວຍຝຸ່ນ… ຕອນທຳອິດກໍບໍ່ເຂົ້າໄປ ແຕ່ສຸດທ້າຍກໍຕ້ອງເຂົ້າ ເພາະຖືກໄລ່ຕາມຫຼັງມາຕິດໆ. ຫຼັງຈາກເຂົ້າໄປແລ້ວ ກໍເຫັນຖາດວາງເຄື່ອງຢູ່ຫຼາຍຖາດ ແລ້ວກໍມີເຄື່ອງຂອງເກົ່າໆ ທີ່ຝຸ່ນຕິດເຕັມ. ພໍແຕ່ມືໄປຈັບເອົາສິ່ງຂອງໃດນຶ່ງຂຶ້ນມາເບິ່ງ ກໍຄຶດອອກວ່າ ເປັນສິ່ງຂອງເກົ່າໆ ທີ່ດົນແລ້ວບໍ່ໄດ້ເຫັນ ມັນມາຢູ່ຫ້ອງນີ້ເອງ ແຕ່ຍັງບໍ່ທັນສຳຫຼວດ ສຽງໂທລະສັບກໍດັງຂຶ້ນ ປາກົດວ່າ ເປັນຄົນທີ່ໄລ່ລ່າໃນຝັນນັ້ນໂທມາ!!!

ຝັນແປກໆ ມື້ຄືນ ຕື່ນມາກໍລືມ ແຕ່ມາຄຶດອອກອີກເທື່ອນຶ່ງຕອນໃກ້ຈະປິດຮ້ານໄປນອນໃນມື້ຕໍ່ມາ ໃນຝັນຂອງມື້ຄືນວານນີ້ນັ້ນ ຝັນວ່າໄປໂຮງແຮມແຫ່ງນຶ່ງ ເຊິ່ງເປັນໂຮງແຮມທີ່ກຳລັງຈະປິດກິດຈະການ ແຕ່ບໍ່ມີໃຜບອກ ທຳອິດເຂົ້າໄປຊອກຫາພະນັກງານຕ້ອນຮັບບໍ່ເຫັນກໍແປກໃຈ ແລ້ວຈາກນັ້ນກໍປະສົບກັບເຫດການຕ່າງໆ ນານາ ຕັ້ງແຕ່ຖືກໄລ່ຂ້າໄປຈົນໜີເອົາໂຕລອດ ແຕ່ກໍບໍ່ຮູ້ຕອນຈົບເປັນແນວໃດ.

ແປກດີ.

ຝັນແປກໆ ຝັນວ່າໄປຫາໝໍ ໝໍຄົນນີ້ບໍ່ແມ່ນໝໍທຳມະດາ ເປັນໝໍພິເສດ ຊິເອີ້ນວ່າໝໍຜີກໍບໍ່ແມ່ນ ເພາະລາວບໍ່ໄດ້ເຮັດປຸກເສກ ແຕ່ເຮັດແນວໃດກໍບໍ່ຮູ້ນຳ ເອົາເປັນວ່າ ໄປຫາເພື່ອໃຫ້ແກ້ໄຂບັນຫາໃຫ້ຄົນອື່ນ ເຊິ່ງກໍເປັນບັນຫາຍຳຮວມມິດຂອງຄອບຄົວນຶ່ງທີ່ເຮັດສິ່ງບໍ່ດີໃຫ້ຄົນອື່ນ ແລະຄອບຄົວນັ້ນກໍມີຄົນທີ່ເຄີຍພົບເຫັນໃນຊີວິດໄປຍຳຮວມກັນຢູ່ຫຼາຍຍຍຍຍ ຈົນຮູ້ສຶກວ່າ ເອ໊ະ ນີ້ມັນແມ່ນຫຍັງກັນ =”=

ຝັນນີ້ເກີດຂຶ້ນຈາກສິ່ງທີ່ຄຶດຢູ່ໃນທຸກໆ ມື້ອີ່ຫລີ

ມື້ຄືນຝັນແປກໆ ຝັນວ່າໄດ້ໄປຫຼາຍໆ ບ່ອນ ແລ້ວມາຮອດບ່ອນນຶ່ງຈະຕ້ອງຂ້າມນ້ຳໄປອີກຝາກ ເຊິ່ງຄວາມແປກກໍຄືນ້ຳນັ້ນເປັນແມ່ນ້ຳໃຫຍ່ ແຕ່ຜັດວ່າມີຄູນ້ຳຍາວໄປຈົນສຸດອີກຟາກນຶ່ງ. ໃນຝັນນັ້ນໄປກັບໃຜອີກຄົນນຶ່ງ ກໍພາກັນຂ້າມໄປ ແຕ່ເມື່ອໄປຮອດອີກຝັ່ງແລ້ວ ປາກົດວ່າເຮັດມືຖືປຽກນ້ຳ ລອງກົດເປີດເບິ່ງ ສັນຍານໄຟຢູ່ໜ້າຈໍມັນຂຶ້ນແລ້ວກໍດັບໄປ ແຕ່ແນວໃດກໍຂ້າມໄປຮອດແລ້ວ.

ຄືນນີ້ຝັນແປກ ຝັນວ່ານັ່ງຢູ່ໃນຫ້ອງ ແລ້ວມີໃຜບໍ່ຈັກນັ່ງຢູ່ນຳກັນຫຼາຍຄົນ ນຶ່ງໃນນັ້ນຫັ້ນແມ່ນຄົນລຸ້ນອາຍຸປະມານ 13-15 ປີ ຍັງເດັກນ້ອຍ ໜ້າຈະແມ່ນມານຳພໍ່ລາວ .. ເຊິ່ງ ຂພຈ ກໍນັ່ງຕັ່ງດຽວກັນ ມັນເປັນໂຊຟາຍາວ ມີສະປຣິງ .. ບັກນ້ອຍນັ້ນກໍໂດດຂຶ້ນໂດດລົງ ແລ້ວທັນໃດນັ້ນເອງ ມີຈັງຫວະນຶ່ງ ມັນພາດແນວໃດບໍ່ຈັກ ເອົາຫົວລົງໄປຟາດໃສ່ກັບໂຕະຢູ່ຕໍ່ໜ້າ ເຊິ່ງມີແກ້ວເປັນແຜ່ນໃສໆ ຕັ້ງຢູ່ .. ຊົງຊິເຈັບ..

ຖັດຈາກຝັນນັ້ນບໍ່ດົນກໍມີສຽງໂທລະສັບດັງຂຶ້ນ ຂພຈ ຕື່ນມາເບິ່ງ ເບິ່ງແລ້ວກໍງົງ ເບີໃຜຫວະ ໂທເຂົ້າເບີເມຍເຮົາ – -’ ເມຍຕື່ນມາເບິ່ງບອກວ່າເບີນ້ອງຊາຍ .. ພໍຮັບສາຍແລ້ວກໍໄດ້ຄວາມວ່າ ມີແຂກຫ້ອງຕື່ນລົງໄປຊັ້ນລຸ່ມ .. ຟັງແລ້ວກໍງົງ ເດິກປານນີ້ ແມ່ນເຂົາຊິຕື່ນໄປເອົາຫຍັງຫວະ ຫຼືວ່າມີຄົນບໍ່ສະບາຍ ຊິໄປຫາໝໍ ຫຼືວ່າເຂົາຕ້ອງການຫຍັງ?

ລົງໄປຮອດ ໂອ… ເວນກຳ ອັນນັ້ນແມ່ນໃຜຫວະ ບໍ່ຄຸ້ນໜ້າເລີຍ ຖາມເບິ່ງໄດ້ຄວາມວ່າ ເພິ່ນມາຊອກຫ້ອງພັກ (ອ່າວ ແລ້ວພວກຍາມມັນປ່ອຍເຂົ້າມາໄດ້ແນວໃດຫວະງົງ ຄົນນີ້ບໍ່ແມ່ນແຂກຫ້ອງພັກເດີ້ -*-) ເພິ່ນບອກວ່າ ຊອກທົ່ວຫຼວງພະບາງແລ້ວບໍ່ມີບ່ອນໃດເລີຍ (ແສດດ ຢ່າມາຕົວະ ຫຼວງພະບາງມີເຮືອນພັກຫຼາຍກວ່າ 50 ບ່ອນ ບໍ່ເຊື່ອດອກຍາມນີ້ມັນຊິເຕັມ ພຽງແຕ່ຊອກຍາກຊື່ໆ ເພາະມັນເດິກ) ກໍເລີຍບອກວ່າ ຫ້ອງເຮົາເຕັມແລ້ວ (ເພາະມັນເຕັມແລ້ວອີ່ຫລີ) ເພິ່ນວ່າ ບໍ່ເປັນຫຍັງ ນອນໂຊຟາລຸ່ມນີ້ກໍໄດ້.. ເອີ ເວນກຳ

ແລ້ວເລື່ອງກໍດຳເນີນຕໍ່ໄປບລາໆໆໆ ຈົນທີ່ສຸດ ຝຣັ່ງຄົນນັ້ນກໍອອກໄປ ຮູ້ສຶກອີຕົນລາວ ແຕ່ມັນບໍ່ຖືກ ບໍ່ແມ່ນແຂກຊິມານອນໄດ້ແນວໃດງົງ ຖ້າໄລ່ເງິນຊິໄລ່ແນວໃດ ໂອ້ ນອນກໍນອນບໍ່ເປັນສຸກ ສົມມຸດໃຫ້ນອນຫັ້ນ ນອນເຝົ້າກັນຢູ່ ເວນກຳ ບໍ່ເປັນແນວ

ຈົບດີກວ່າ.

ມື້ຄືນຝັນແປກ ຝັນເປັນເລື່ອງຍາວໆ ຕອນຕົ້ນຝັນວ່າຄົນຮັກຖືກໃສ່ຮ້າຍປ້າຍສີ ຕອນຫຼັງໃກ້ຕື່ນຝັນວ່າໂກນໜວດ ແຕ່ໂກນແນວໃດກໍບໍ່ແລ້ວ ມັນບໍ່ກ້ຽງຈັກເທື່ອ ບໍ່ດົນກໍຕື່ນ.

ເປີດຕຳລາເພິ່ນວ່າ ຝັນວ່າຖືກໃສ່ຮ້າຍ ທຳນາຍວ່າຈະໝົດຈາກເຄາະຈາກໂສກ ສຸຂະພາບແຂງແຮງ…

ສ່ວນຝັນໂກນໜວດບໍ່ແລ້ວ ເພິ່ນວ່າຈະມີການເດີນທາງໄກກະທັນຫັນວ່າຊັ້ນເດີ້

ທຳມະດາ ຂພຈ ຈະບໍ່ຝັນແບບລິເກໆ ແບບນີ້ ໃນຝັນນັ້ນມັນເປັນເຫດການປະມານວ່າ ຮັກກັບຍິງຄົນນຶ່ງເຊິ່ງມີຮູບຮ່າງໜ້າຕາປານດາລາ ຫາກວ່າຈື່ບໍ່ຜິດໜ້າຈະແມ່ນຄົນທີ່ຊື່ເປັນຊື່ໝາກໄມ້ຄ້າຍຊື່ຂອງຄອມຯ ຍີ່ຫໍ້ນຶ່ງ^[1].

ຄວາມແປກປະຫຼາດມັນຢູ່ບ່ອນວ່າ ທັງສອງຄົນຮັກກັນ ແຕ່ຜູ່ຍິງຄວາມຈິງຕາຍໄປດົນແລ້ວ ດັ່ງນັ້ນລາວກໍຄືຜີນັ້ນເອງ. ມັນມີຈຸດນຶ່ງທີ່ ຂພຈ ຮູ້ວ່າ ຄົນຮັກເປັນຜີ ເຊິ່ງກໍໄດ້ຕິດຕໍ່ກັບຄົນຮູ້ຈັກ (ໃນຝັນແມ່ນອ້າຍຢູ່ຮ້ານເກມ^[2]) ໃຫ້ຊ່ວຍເຫຼືອ ກໍມີພິທີກຳແປກໆ ຫຼາຍຢ່າງ. ແຕ່ແປກກວ່ານັ້ນແມ່ນຢູ່ຮ້ານເກມມີຮ້ານຂອງແມ່ຢູ່ນຳ ຂາຍ bakery ເຊິ່ງພະນັກງານຄົນນຶ່ງເຮັດເຂົ້າໜົມຕົກສອງເທື່ອຕິດຕໍ່ກັນ; ຂພຈ ຈຶ່ງໄປຕໍ່ວ່າ ເພິ່ນກໍທຳທ່າບໍ່ພໍໃຈ^[3].

ອ້າຍຢູ່ຮ້ານເກມກໍແນະນຳວິທີຕ່າງໆ ທີ່ຈະຫາທາງໜີອອກມາຈາກຄົນຮັກທີ່ເປັນຜີນັ້ນ. ຕາມໃນຝັນ ມີຄວາມຮູ້ສຶກເສຍໃຈຫຼາຍທີ່ເລື່ອງເປັນແບບນີ້ ໃຈນຶ່ງກໍຍັງບໍ່ເຊື່ອຄັກ ອີກໃຈກໍຄຶດວ່າ ເມື່ອເປັນຂັ້ນນີ້ແລ້ວຄົງຈະຢູ່ບໍ່ໄດ້. ເສຍດາຍທີ່ຝັນນັ້ນຕື່ນມາແລ້ວເລືອນຫາຍໄປ, ຈື່ພຽງບາງສ່ວນ ມີຕອນນຶ່ງ ຄົນຮັກທີ່ເປັນຜີລາວຍັງບໍ່ຮູ້ວ່າ ຂພຈ ຮູ້ຄວາມຈິງ ລາວຈຶ່ງມາຫາຢູ່ຮ້ານເກມ ແລະສົນທະນາກັນເລັກນ້ອຍກ່ອນ ຂພຈ ຈະຂໍໃຫ້ລາວກັບບ້ານໄປ.

ມີຈຸດນຶ່ງທີ່ຮູ້ສຶກໄດ້ແມ່ນ ຜູ່ຍິງຄົນນັ້ນມີຄວາມອາຄາດຫຼາຍ ລາວຈະບໍ່ຍອມແນ່ນອນຫາກຮູ້ວ່າ ຂພຈ ຕ້ອງການໜີໄປ; ໃນຄວາມຝັນ ຂພຈ ຫາທາງປົກປິດລາວໄວ້ຕະຫຼອດໄລຍະເວລາທີ່ມີການເຮັດພິທີ. ສ່ວນເລື່ອງຈະເປັນແນວໃດໃນຕອນຈົບກໍບໍ່ຮູ້ເລີຍ ເພາະແຂກຫ້ອງປຸກກ່ອນ!!!

—————————————————-

1. ອາດເປັນໄປໄດ້ວ່າ ເຄີຍເຫັນພາບຂອງລາວຊ້ຳໆ ເຮັດໃຫ້ເກັບໄປຝັນ ໂດຍດຶງຂໍ້ມູນມາຈາກຈິດໃຕ້ສຳນຶກກໍເປັນໄດ້.
2. ເຫດທີ່ຝັນກ່ຽວກັບອ້າຍຢູ່ຮ້ານເກມ ຄົງເພາະຊ່ວຍເຫຼືອກັນມາດົນ ຮູ້ຈັກກັນມາສິບປີ.
3. ພະນັກງານຄົນນັ້ນຊື່ຂຶ້ນຕົ້ນດ້ວຍໂຕ ສ; ຈຸດນີ້ເປັນໄປໄດ້ວ່າເກັບມາຈາກຈິດໃຕ້ສຳນຶກເຊັ່ນດຽວກັນ ເພາະໃນຊີວິດຈິງ ຂພຈ ມັກຈະຄຶດສະເໝີວ່າ ໄປເວົ້າຫຍັງໃຫ້ລາວຫຼາຍ ລາວຈະບໍ່ພໍໃຈແລະສະແດງກິລິຍາແບບນັ້ນອອກມາ ເຊິ່ງກາຍເປັນວ່າມັນໄປປາກົດໃນຝັນແທນ.